Santo Estevo do Ermo e a súa fraga é moito máis que unha fervenza. Trátase do lugar propicio para escapar da rutina diaria, deixarse fluir e conectar coa natureza e con nós mesmos. Unha paisaxe natural sensacional, entre altos riscos e penas que colgan verticais, e que conforman un refuxio para a biodiversidade da zona. Porén, este espazo está catalogado como Área de Especial Interese Paisaxístico segundo o Catálogo das Paisaxes de Galicia.
Aquí, o paseo converterase nunha experiencia de achados naturais, arquitectónicos e etnográficos que agardan por unha mirada curiosa disposta a saborear cada instante.
O son da auga que se precipita contra a rocha precede a chegada á fervenza, a uns 200 metros da ermida de Santo Estevo. Un lugar no que a auga ten unha forte presenza xa que, dúas fontes de augas mediciñais manan neste entorno, tamén coñecido como Santo Estevo de Augas Santas.
O solitario espazo habitado pola ermida, o río e a fervenza dá lugar a un espectáculo vital. Aquí o camiñante atoparase cunha vigorosa e heteroxénea vexetación autóctona. Un lugar para respirar con consciencia e disfrutar da beleza da nai terra.
Accesibilidade
O acceso en coche atópase sinalizado dende o centro de San Cosme de Barreiros. Xunto ao estanco toma o desvío marcado, sigue as indicacións durante 1,5Km ata chegar ao último desvío – marcado no mapa – (onde comeza o tramo sen asfaltar). Poderás deixar o coche neste punto e baixar a pé ata o lugar (1,3Km de distancia).
Se prefires baixar o último tramo sen asfaltar co coche recorda que non se recomenda facelo con vehículos moi baixos ou altos (como coches deportivos, furgonetas ou autocaravanas). Logo, a saída (en coche) farase por un camiño diferente, sinalizado nas interseccións indicando «San Cosme». Este camiño está maiormente sen asfaltar.
No percorrido a pé, dentro da fraga de Santo Estevo, atoparás un sendeiro circular e sinalizado (con desvíos puntuais) que te levará polos diferentes puntos de interese do lugar. A distancia a percorrer dentro da fraga é de aproximadamente 1Km. Dentro deste percorrido hai zonas de escaleiras e puntualmente embarradas e/ou rochosas.
Visitas complementarias
