Situado a 334 metros de altitude, e catalogado como Área de Especial Interese Paisaxístico de Galicia, permítenos apreciar, aos seus pés, a capitalidade do municipio e, ao fondo, os oito quilómetros de praias de Barreiros. 

Mais a beleza natural que, probablemente, capte toda a nosa atención será a da Ría de Foz-Masma. Dende aquí, ábrense aos nosos ollos as súas dimensións, formas e cores. O aspecto desta paisaxe variará segundo a época do ano, o momento do día, o estado da marea e, por suposto, en función da meteoroloxía; pois dalgunha forma a paisaxe tamén ten vida.

Se continuamos coa mirada cara ao Oeste, poderemos percorrer a costa da Mariña Lucense ata Burela. En primeiro termo atopamos Foz, xusto á outra beira da ría e, máis alá veremos a vila de Burela. Terra a dentro preséntasenos montes tan representativos como o Pico de Cornería (432m.) ou o Pico da Frouxeira (426 m).