A maioría dos peregrinos coinciden en que o Camiño cámbiate, non volves igual. Trátase dunha experiencia que te leva a redescubrirte a ti mesmo/a e a mudar a túa percepción da vida.
Barreiros forma parte da primeira etapa en Galicia deste itinerario xacobeo, Patrimonio da Humanidade, discorrendo por unha zona rural de gran beleza natural.
Tras deixar atrás o concello de Ribadeo, entrarás neste concello, onde disfrutarás das nosas paisaxes dominadas pola cor verde ao longo dun treito duns 8Km antes de rematar a etapa en Lourenzá.
Ultreia e bo camiño!
Unha vez entramos en Barreiros, dende o alto, divisaremos un pequeno val e, aos nosos pés, Vilamartín Pequeno coa súa igrexa na honra de San Xoan Degolado. Enfrente, seguindo o camiño atópase Vilamartín Grande que destaca pola presenza da Capela da Virxe do Carme que data do século XVII. Neste lugar poderemos selar a credencial e repoñer forzas grazas á existencia dun aloxamento privado: Tentempé Peregrino. Antes de baixar a Gondán, o alto de Vilamartín Grande pode servirlle ao peregrino de miradoiro, dende onde se divisa unha panorámica do Val de Cabarcos.
Sabías que o topónimo de Cabarcos procede de Cibarcos e que aparece no documento medieval máis antigo que se conserva en España?
Trátase do Diploma do Rei Silo asinado no ano 775 e que se conserva na Catedral de León. Nel, o Rei Silo fai unha doazón a varios monxes para que edificaran un mosteiro neste territorio.
A continuación, atopamos Gondán, onde desviándonos un pouco do Camiño podemos achegarnos ata a Capela da Virxe do Pilar. Regresando ao trazado Xacobeo, camiñamos en descenso ata a parroquia de San Xusto de Cabarcos. Neste punto poderase facer outro alto no camiño para, de novo, repostar forzas no Bar-Restaurante A Curva, onde tamén é posible selar a credencial. Antes da igrexa, atopamos un cruceiro en recordo da Capela do Bo Suceso e, de seguido, a Igrexa parroquial. Nela son de admirar o retablo barroco, do século XVIII, o púlpito e dous confesionarios.
Dende aquí o peregrino abandona o concello de Barreiros para adentrarse no de Lourenzá.
Información útil
