O patrimonio etnográfico engloba aqueles bens que representan a cultura e a identidade popular dun territorio. Simboliza os modos de vida nos nosos devanceiros. Caracterízase pola súa fusión coa paisaxe, de forma que o territorio constitúe un gran museo ao aire libre no que empaparse dunha grande diversidade de manifestacións culturais tanto de natureza material como inmaterial.

O legado etnográfico do noso rural abrangue dende casas labregas, hórreos, cruceiros, lavadoiros, pozos, pontes, muíños, palleiras, fornos ou pombais, ata un valiosísimo patrimonio intanxible como lendas, topónimos, expresións populares, refráns, diversidade lingüística, cantigas ou bailes. Entre eles poderíamos destacar os Cabozos e o cruceiro de Viladaíde, os cabozos da Perana e os da Casa Rafael e A Cabana de San Xusto, os lavadoiros de Áspera-Vilar e San Miguel de Reinante, as fontes milagreiras do Santo Estevo do Ermo ou o pombal da Casa de Alvariño en Santiago de Reinante. Ademais, a Asociación Folclórica O Arco da Vella, tamén de San Miguel de Reinante promove, dende hai máis de corenta anos, a conservación e divulgación da danza e música tradicional de Galicia.