Trátase dunha vivenda de dimensións considerables con ornamentación propia da arquitectura indiana. 

Ocupando todo o ancho da fachada principal conta cun amplo balcón corrido con varanda de forxa de intrincada decoración e balcón presidencial sobresaínte que, á súa vez, serve de porche soportado por dúas columnas de ferro fundido. O resto dos balcóns dispoñen así mesmo dunha fermosa varanda de forxa, excepto o presidencial da planta segunda  e o da bufarda que sobresae a modo de torre, ambos protexidos por fermosas varandas de cemento. 

Sobre das ventás dispóñense delicadas molduras en relevo con ornamentación vexetal e guirnaldas con efecto de caída sobre os laterais. 

Rematando o conxunto emprázase unha bela cornixa con motivos florais.